சிவம் !

அம்புடைக் காமனை அங்கணில் எரித்த,
அம்பலவாணனை நெஞ்சில் நேர் இருத்த,
வெம்பிடும் மனதிற்குக் கிட்டும் மருந்து !
தெம்புற தேவனை அள்ளி அருந்து !

சடையடைப் பட்டந்த கங்கை விடுத்துத்,
தடையின்றி மாந்தர்க்குக் கிட்டக் கொடுத்த,
விடையேறு நாயகன் விடமுண்ட கண்டன் !
இடையூறு நீக்கிடும் திருநீற்று ஆண்டன் !

தண்ணொளிர் நிலவது தாங்கிய முடியும்,
மண்ணுளோர் உய்யவே தூக்கிய அடியும்,
வெண்பனிக் கயிலையன் காட்டிடு அருளாம் !
எண்குணன் அவனை உணர்த்திடு பொருளாம் !

நாகத்தை அணியெனத் தாங்கிடும் நேசன் !
தேகத்தில் தோலுடைப் போர்த்திடும் ஈசன் !
லோகத்தின் மாயையைப் போக்கிடும் மாற்று !
மோகத்தை வென்றிடும் ஞானத்தின் ஊற்று !

இடப்பாகம் மங்கைக்கு ஈந்தானைப் பாடி
மடமூடந்தனை மாற்றும் அரனோடு ஆடி,
தடமாறும் நிலைநீங்கி நேர்ப்பாதை மாறு !
நடமாடும் தலைவோனும் தருவானே பேறு !

அன்பெனும் பிடியுள் அகப்படும் சிவமாம் !
துன்பமும் துயரமும் போக்கிடும் தவமாம் !
இன்பங்கள் வழங்கிடும் இறைவனின் பாதம் !
என்றென்றும் ஒலித்திடும் உடுக்கையின் நாதம் !

Regards,

Pavithra

 

Thank you, stayblessed !

 

நன்றி பெரியம்மா !

பெரியம்மா உங்களது பிரியத்தை வெளிப்படுத்தும் சொற்களுக்கு எனக்குத் தகுதியில்லை. உங்கள் அன்பும் ஆசியுமே நான் என்றும் விரும்புவது.

ஸுபாஷிணி, GG- புரிதலுக்கும்,பின்னூட்டத்திற்கும் நன்றி !

 

ஆம் லக்ஷ்மி, உங்கள் கூற்று சரியே ! அன்பின் வழியது உயிர்நிலை, அந்த அன்பே உயர்நிலைக்கும் வழியாகும் ! பின்னூட்டத்திற்கு நன்றி !