' வாட்ஸ் அப் ' வாழ்க்கை (sushi Krishnamoorthi)

' வாட்ஸ் அப் ' வாழ்க்கை

மகன் ' வாட்ஸ் அப் ' உடன் கூடிய கைப்பேசி கொடுத்தபொழுது அகமகிழ்ந்தாள் தாய் இனி எந்நேரமும் மகன் தன்னிடம் பேசுவான் என்று. ஆனால் மகனோ 'அம்மா ' வாட்ஸ் அப் ' பில் என் ' குட் மார்னிங் ' பார்த்தால் நான் சுகமாக இருக்கிறேன் என எடுத்துக்கொள் - அதேமாதிரி நீயும் ஒரு ' குட் மார்னிங் ' மறக்காமல் செய்துவிட்டால் நீ சுகமாக இருக்கிறாய் என்று நான் அறிந்துக் கொள்வேன்" என்றான். ஒருநாள் ' வாட்ஸ் அப் ' பில் அவனுக்கு ஒரு செய்தி 'உன் அம்மா இறந்துவிட்டாள் . இறப்பதற்கு முன் அவள் கேட்டுக்கொண்டபடி இந்த செய்தி உனக்கு அவள் கிரியை முடிந்தபிறகு அனுப்புகிறேன். அவள் விருப்பப்படி நீ கொடுத்த கைப்பேசியை அவளுடன் கூடவே எரித்து விட்டோம். அவளுக்கும் மகன் கூடவே இருந்த சந்தோஷம் . உனக்கும் நேரம் மிச்சம். மீதி கிரியைகளையும் நீ ' வாட்ஸ் அப் ' பிலேயே முடித்துக் கொள்ளலாம் என்பதே உன் தாயின் விருப்பம்." படித்த மகன் அழுதது யாருக்காக.?