மழைத்துளி மழலைகள் ... (தனிப்பாடல்கள் புது ம&#

மழைத்துளி மழலைகள் தவழ்வதைக் கண்டு
குழைந்திடும் பூமகள் நெஞ்சம் - கன்னக்
குழிவிழும் சிரிப்பை சேயிடம் காண
விழிவழி வெளிப்படும் தாய்மை .

குளக்கரை மேட்டில் தவசியைப் போலே
உளமொன்றி நிற்கும் கொக்கு - இறை
விளக்கத்தைத் தேடி அலைகின்ற மனிதர்க்கு
குளக்கரைக் கொக்கே மனது .

சேற்றில் முளைத்த செந்தாமரை என்ற
கூற்றும் இங்கே உண்டு - மழைக்
காற்றும் குப்பையைக் கோபுரம் தன்னில்
ஏற்றிடும் காட்சியும் உண்டு .

கோர்த்த மாலையில் கோதையின் காதலைப்
பார்த்தான் துயிலும் அரங்கன் - அன்பிலே
வார்த்த அவளது பாவைப் பாடலால்
சேர்த்தான் திருவடி தன்னில் .

நவிலும் சொற்களால் நலிந்தவர் பயனுற
குவியும் புண்ணியம் பாரீர்- மடல்
அவிழ்ந்த மலர்களில் வழிந்திடும் தேனென
செவிக்ககுணவாகும் நற் சொற்கள் .

தேயும் நிலவின் தண்ணொளி பூமியில்
பாயும் இரவுப் பொழுது - குளிர்
காயும் குளத்தில் பூத்த அல்லியும்
ஓயும் ஓர்பாதி உலகு .

காலைப் பரிதியின் பேரொளி பட்டு
சோலை மலர்வதைக் கண்டு - பூ
மாலை தாங்கிய கொடிகளின் திருமண
ஓலை ஏற்றிடும் வண்டு .

இருமனம் தன்னை அன்பிலே இணைத்து
ஒருமனம் ஆக்கும் காதல் - அதைத்
திருமணம் தன்னில் முடிப்பது காதலர்
இருவரும் கொண்ட ஆழம் .

மாதர் தீங்குரல் பாட்டில் வடிவது
கோதகன்ற தேன் அமுது- அவர்
கீதம் இசைக்க அமைதியில் ஆழும்
நாதன் படைத்த நல்லுலகு .

கரத்தில் வீணையை ஏந்தும் வாணியைக்
கருத்தில் நிறைப்பது சிறப்பு - கல்வி
வரத்தை அருளிடும் தேவியின் பாதங்கள்
சிரத்தில் ஏற்பது உவப்பு .



Regards,

Pavithra


(பி . கு @saidevo , ஐயா , இவை மரபில் சேருமா ? )

 

Re: மழைத்துளி மழலைகள் ... (தனிப்பாடல்கள் புது &

மிக்க நன்றி !
என்றும் அன்புடன் ,

பவித்ரா