பேய் பிடித்ததோ?

வழக்கம் போல் தாமதமாகக் கிளம்பி,
வாடகை வண்டி ஒன்றினைப் பிடித்து,
வாடையின் குளிருக்கு மெல்ல நடுங்கி,
வண்டி மறைப்பை நன்றாய் இழுத்து,

அமர்ந்திருக்கையில் வண்டியும் இருமி,
புகையாய்ப் புகைந்து, நின்றே போனது.
கனவில் ஆழ்ந்தவனைக் குரல் எழுப்பி,
தள்ளச் சொன்னதில் வெறுத்தே போனது.

உடல் பருமனை சபித்துக் கொண்டு,
உந்தித் தள்ளியும் பயனில்லை என்று,
தெரிந்து பையை எடுத்துக் கொண்டு,
தளர நடந்தேன் அலுத்துக் கொண்டு.

வீடு நான்கு கல் தொலைவில் தானென்று,
தெரிந்து கொஞ்சம் சமாளித்துக் கொண்டு,
நடந்தவன் திடீரென உணர்ந்த அமைதியில்,
சற்றே தயங்கி, பின் தொடர்ந்த பொழுதில்,

எங்கோ ஒரு நாய் அழுகுரல் கேட்டு,
உடல் எங்கும் நடுக்கம் பரவிடக் கண்டு,
தனக்குத் தானே தைரியம் சொல்லி,
முன்னே நகர்ந்தேன் எனையே எள்ளி.

சுடுகாடொன்று என் கண்ணில் படவும்,
பார்க்காதே என ஒரு குரல் சொல்லவும்,
ஏனோ அத்திசை பார்க்க, தொலைவில்,
புகையும் கொஞ்சம் தெரிய விரைவில்,

அவ்விடத்தைக் கடக்கத் துடித்தன கால்கள்.
பின்னாலிருந்து ஏதோ என்னைப் பிடித்து,
நிறுத்த, பதறி, காதில் பல குரல்கள்,
கேட்டது மாதிரி இருந்ததை அடுத்து,

சுற்றிப் பார்த்தால் ஒருவரும் இல்லை.
கடவுள் பெயரை சொல்லிக் கொண்டு,
கடக்க, வேறு தொல்லைகள் இல்லை.
கடைசியில் வீடு சென்றதும் உண்டு,

உறங்கப் போகுமுன் சிந்தனை செய்தேன்
எது வந்து என்னைப் பிடித்தது என்று.
விரைவில் என் முன் விடை வரத் தெளிந்தேன்
என் பயமெனும் பேயின் பிடி அதுவென்று.
-ஸ்ரீ

 

உங்கள் விரைந்த பாராட்டுக்கும், அக்கறைக்கும் நன்றி நித்யகல்யாணி. என் அனுபவங்களில் சிலவற்றை எழுத முயற்சி செய்கிறேன். உங்களைப் போன்றோரின் பின்னூட்டங்கள் மேலும் எழுதத் தூண்டுகின்றன. -ஸ்ரீ

 

ஆம் சோனியா. அதுவும் என் அனுபவமே. வேறு சில விவரிக்க முடியாத, திகைப்பில் ஆழ்த்தும் அனுபவங்கள் உண்டு. முடிந்தால் எழுதுகிறேன். நன்றி, உங்கள் பின்னூட்டத்துக்கு. -ஸ்ரீ

 

நல்ல கருத்து லதா. பயம் என்னென்ன செய்யும் என்று மருத்துவ உலகம் சொல்வதைப் படித்தால் பயமாக இருக்கிறது. உங்கள் பின்னூட்டத்துக்கு நன்றி. -ஸ்ரீ

 

உங்கள் பின்னூட்டத்துக்கும், கருத்துக்கும் நன்றி தீபா. -ஸ்ரீ