நில அதிர்ச்சி

அரிதாகப் பணியில் ஆழ்ந்திருந்த பொழுதில்
அலை போலக் கணினியின் திரையில் தோன்ற,
அலுப்பே காரணமாய் இருக்குமெனும் முடிவில்,
அண்ணாந்தும், குனிந்தும் பார்வையை ஊன்ற,

தலை மிக இலேசாகச் சுழல்கிறதா? அல்லது,
தூக்கத்தில் உடல் விழப் போகிறதா? என்று,
சிந்திக்க, அவ்வறையே ஊஞ்சல் ஆடியது,
கணினியும் விழுந்து விடப் போகிறது என்று,

அதைப் பிடிக்க முயன்றவன் காலடியில்,
பிடிப்பின்றி கீழே சரிவதை உணர்ந்து,
அலற முற்பட, அந்நேரம் தொண்டையில்,
பெரிதாகும் பந்து போல் ஏதோ தடுத்து,

தலை சுற்றி, இருந்த பொருட்களும் விழுந்து,
தனியாக இருப்பதையும் தாமதமாய் உணர்ந்து,
வாயில் ஈரப்பதமின்றி மொத்தமாய் உலர்ந்து,
நிற்காமல் பேசுகின்ற நானும் மிகப் பயந்து,

நினைவு தப்பாமல் இருந்தது அதிசயமென்றே,
இன்றைக்கும் நினைத்துக் கொள்வது உண்டு.
ஆடிய அறை நிற்க நிலவிய அமைதியொன்றே,
சற்றே ஒரு நிம்மதியை வழங்கியது அன்று.

அறை விட்டு வெளியில் ஓட, அங்கே பல பேர்,
என்னைப் போல் அதிர்ச்சியில் இருக்கக் கண்டு,
என்ன நிகழ்ந்ததென்று, அறிந்ததும், உடம்பே,
தூக்கி வாரிப் போடுவதை உணர்ந்தேன் அன்று.
-ஸ்ரீ

 

உங்கள் உடனடிப் பாராட்டுக்கும், அனுபவப் பகிர்வுக்கும் நன்றி நித்யகல்யாணி.
வெவ்வேறு அனுபவங்களை எழுதும் முயற்சியில் தொடர்ந்து ஈடுபட, இது போன்ற பின்னூட்டங்கள் உதவுகின்றன. -ஸ்ரீ

 

பல(ர்) அனுபவங்கள் இப்பதிவின் மூலம் வருவது மகிழ்ச்சியாக இருக்கிறது. உங்கள் பின்னூட்டத்துக்கு நன்றி சரோஜ். -ஸ்ரீ

 

உங்கள் பின்னூட்டத்துக்கு நன்றி லதா.
அவர்கள் நலமாய் மீண்டு சுகமாய் இருக்கிறார்கள் இல்லையா?
-ஸ்ரீ

 

மகிழ்ச்சி லதா.
மிகப் பெரிய சரிவு ஏற்படும் போது தான்,
அளவிடற்கரிய ஆற்றலும் வெளிப்படுகிறது. -ஸ்ரீ