திருவிழா முடிந்த பின்!

திருவிழா முடிந்த கிராம வீதியில் நிறைய குப்பை சேர்ந்திருக்கும்.
திரும்பிய பக்கம் எங்கும் ஓர் வெறுமை மட்டும் நிறைந்திருக்கும்.
தினமும் இரவில் விழித்தோருக்கு உள்ளே ஏக்கம் படர்ந்திருக்கும்.
திடீரென ஒலிக்கும் வேட்டுச் சத்தம் அறவே மறைந்து போயிருக்கும்.

விளக்கொளி, விழியொளி எது பெரிது என்னும் கேள்வி மறந்திருக்கும்.
விடலைகள் எல்லாம் வினை மறந்து பள்ளிக்கூடம் போயிருக்கும்.
விளக்கி விட்ட பாத்திரம் எல்லாம் பரணில் சென்று சேர்ந்திருக்கும்.
விருந்தாய் வந்த உறவும் நட்பும் விடைபெற்று ஊர் போயிருக்கும்.

வில்லுப்பாட்டும் கரகமும் நினைவில் மெல்ல மங்கித் தேய்ந்திருக்கும்.
வீட்டில் இருந்த கலகலப்பெல்லாம் எங்கே எனும்படி ஓய்ந்திருக்கும்.
வாங்கிய கடனும் பூதம் போலே நினைவில் வந்து பயமுறுத்தும்.
வட்டிக்கடையில் தன் நகையும், தவணை சொல்லி அச்சுறுத்தும்.

கணக்கு பார்த்துச் செலவழி என்று முதலில் ஓர் குரல் கேட்டிருக்கும்.
கணக்கைப் பார்த்தால் மகிழ்ச்சி எங்கே என்று மனமே கடிந்திருக்கும்.
கணக்கின் மீதம் சுழி தான் என்ற உண்மை இன்று உறைத்திருக்கும்.
இருந்தும் மனமோ, மீண்டும் அடுத்த திருவிழாவுக்கு காத்திருக்கும்!
-ஸ்ரீ

 

Thanks for your appreciative feedback Rama. Engayum pOgalai. Hectic work, even in week-end and net access is very very slow from home. -rgs

 

Thanks Latha, for your appreciation. Google tamil transliteration romba slow....veetla net romba slow-aa irukku..... -rgs

 

Thanks for your thoughts and appreciative feedback Deepa. -rgs

 

உங்கள் பாராட்டுக்கு நன்றி தேவப்ரியா. ஆம். பல நாட்கள் உறவினர் வீட்டில்
ஒரு கவலையுமின்றி பொழுது போக்கிய நாட்கள் அவை. நிற்க.
உங்கள் அவதாரப் படம் மிக அழகாக இருக்கிறது. -ஸ்ரீ