ஆசையின் ஓசை !

வாவியுள் செய்ய தாமரை
ஆவி கொய்யுமென் தேவதை !
பாவியேன் காதல் கைதியாய்
தேவியின் இதயம் பூஞ்சிறை !

செல்லிடப் பேசி சிணுங்கியே
சொல்லிடும் காதல் சேதியை !
மெல்லவே அவள் நினைவுகள்
கொல்லுமே எந்தன் தனிமையை !

சிறுவிதழ் முத்தம் கிடைக்குமா ?
குறுகுறுக்கும் என் நெஞ்சமும் !
துருதுரு விழிகள் காண்கையில் ,
சுறுசுறுக்கும் என் வாலிபம் !

வைகறை செம்மை வண்ணத்தை
மைவிழிக் கன்னம் பூசினால்
கைவிரல் கோர்க்கும் நாளுக்காய்த்
தைவரைக் காக்க முடியுமோ ?

கோள்கள் நன்றாகக் கூடிடும்
நாளுமே பார்க்க வேண்டுமா ?
தோளென்னை நீ சேர்ந்திடு,
தேளல்ல நானும் தங்கமே !

மாலை ஆனதும் மையலும்
லீலை செய்யுதே காதலி !
சேலைத் தலைப்பிலே நூலென,
சோலையே எனை மாற்றடி !

காதலும் இந்தக் காமமும்
சாதல் இல்லாத சாஸ்வதம் !
ஆதலால் என்னை அணைத்திட
ஓதல் வேண்டாமே சாஸ்திரம் !

ஆசையில் நானும் தவிக்கிறேன் !
மீசையைத் தடவிப் பார்க்கிறேன் !
பூசைக்கு மலரைக் கேட்கிறேன் !
ஓசையுன் காதில் விழுந்ததா ?

Regards,

Pavithra

 

@ Jey, @Harini73 , @kaniths

நன்றி , நண்பர்களே !

 

வஞ்சப்புகழ்ச்சியா ? புகழ்ச்சி வஞ்சமா ?

ஓ , பாராட்டா !

பின்னூட்டத்திற்கு நன்றி !

 

. Thank you , jskls !