இனிக்கும் முதுமை

இளமைச் சாயம் மெல்லக் கரைய,
முதுமை நரையில், தேய்வில் தெரிய,
அனுபவத்தால் வாழ்க்கை நிறைய,
கனிவும் தானே நமை வந்தடைய,

தலை தூக்கிப் பார்க்கும் வெண்மேகமென,
கண்டோர் எல்லாம் அண்ணாந்து இருக்க,
தலை தாழ்ந்திருக்கும் கனத்த கதிரென,
முதிர்ச்சியை அடைந்தே நாமும் இருக்க,

பேரன், பேத்திகள் என ஒரு கூட்டம்,
கதை கேட்டு நமை தினம் நச்சரிக்க,
அவர்கள் அருகில் இல்லாவிடினும்,
இணையத்தின் வழி நாம் உரையாட,

மருந்துகள் மூலம் உயிர் வாழ்ந்தாலும்,
பிறர் வருந்தாமல் அறிவுரை சொல்லி,
ஏற்றால் மகிழ்ந்து, அவை தவிர்த்தாலும்,
குன்றாமல் அவர் குறையைத் தள்ளி,

நிறையை மட்டும் பார்க்கும் முதுமை,
முழுதாய் என்றும் இனிக்கும் எவர்க்கும்.
நிறைவாய் வாழ்ந்து அதிலே இனிமை,
அடைந்த திருப்தியும் வருமே நமக்கும்.
-ஸ்ரீ

 

உங்கள் முதல் பின்னூட்டத்துக்கு மிகவும் நன்றி விஜி மேடம்.
வயது உடம்புக்கன்றி மனதுக்கில்லை தான். ஏற்றுக் கொள்கிறேன். -ஸ்ரீ

 

உங்கள் பாராட்டுக்கு மிகவும் நன்றி Sanmithran -ஸ்ரீ

 

உங்கள் பின்னூட்டம் அர்த்தம் நிறைந்தது நித்யகல்யாணி. பாராட்டுக்கு நன்றி. உங்களுக்கும் என் மனமார்ந்த புத்தாண்டு வாழ்த்துக்கள். -ஸ்ரீ

 

உங்கள் பின்னூட்டத்துக்கு நன்றி லதா.
உடம்பிடை உயிராய் இருந்த நட்பால்,
தலைமுடி வெளுக்காதிருந்தார் அன்று.
இளமையில் வெளுக்க, சாயப் பூச்சால்
நரைமுடி விரைந்தே மறைப்பார் இன்று.
-ஸ்ரீ