என் வேடந்தாங்கலின் பறவைகள்---கிளி!!!!!!!

நிற்பதுவே, நடப்பதுவே,பறப்பதுவே நீங்களெல்லாம்
சொற்பனந்தானோ? பல தோற்றமயக்கங்களோ?
கற்பதுவே,கேட்பதுவே,கருதுவதே நீங்களெல்லாம
அற்பமாயைகளோ? உம்முள் ஆழ்ந்தபொருளில்லையோ?.....பாரதியார்

​

​

இல்லுப்பை மரத்தின்
கிளைகளின் இலைகளில்
ஆரவாரக் கூச்சலுடன்
இலைப்புதருக்குள் இலைப்பொதி போல
எரி நட்சத்திரமாய் கிளிக் கூட்டம்.
உருட்டிபார்த்த வல்லூருவின் ஓர் அசைவில்
அத்தனை இலைகளும் கிளிகளாய்.
மேலெழுந்து
வானின் நிறத்தை தம்
சிறகுகளால் மூடி
காற்றி வெளியை கூடாக்கி
பூமியை நெல் தானியமாக்கி
அண்டவெளியே
ஆலோலங்கிளியின் தேசமாய் போனது.

விச்சு,,,, கிச்சு
கீச் கீச்......
ஸ்வீட்டி,,,, ட்வீட்டி
கீச் கீச் ......
இவையெல்லாம்
உனக்குச் செல்லப் பெயராம்!
சொன்னதைச் சொல்லுமாம் கிளிப் பிள்ளை.
சொல்லித்தான் பாரேன்
நீயும் உன் பெயரை
கீச் கீச் ......

ஊஞ்சலில் ஆடி
வித்தைகள் செய்யும்
வித்தாரக் கள்ளி நீ!
மோசமான முடக்கு வாதத்தால்
செயலிழந்து, பேச்சற்று
ஞாபகம் அற்று சஞ்சலம் உற்று
இருப்பவர்க்கும் இறப்பவர்க்கும்
நோய் போக்கும்
வைத்தியம் செய்யும்
மருத்துவ மேதாவி நீ!

தேசியப் பறவையைத் தோற்கடித்த
ஜோஷியப் பறவை நீ !!!!
ஹாசியமாய் இருந்தாலும்
பாஷைகளைப் பேசும்
ஞானமுள்ள தனிப்பிறவி நீ!

கிச்சு கிச்சு கீச்சுக் குரலில்
உன் பேச்சு கேட்கவா?
கீதம் போல்
மேல் அலகு மட்டுமே ஆட
கிள்ளைமொழி கேட்கவா?

எழுத்தறிவும் இருந்ததில்லை
எழுதிவைத்தும் படிப்பதில்லை
ஆய்வும் செய்வதில்லை
அந்த பயம் உனக்கில்லை
உள்வாங்கி பின் பேசும்
உன் பேச்சு
அச்சச்சோ கிளியக்கா.....
என் சொல்வேன்
உன் அருமை!

வதவத இனப்பெருக்கம் உன்னிடம் இல்லை
ஓராண்டிற்கு ஒரு முட்டை மட்டுமே
என்னே உன் சிக்கனம்!!!!!!!

தளிர்ப்பச்சை, எலுமிச்சை
தங்ககிரணம் பஞ்சவர்ணம்
வெண்பஞ்சு வெண்சாம்பல்
பட்டுத்துணி,கெட்டிநீலம்
இத்தனையும் உன் நிறமா????????

எத்தனை வண்ணங்கள் இயற்கையிலே
அத்தனையும் உண்டு உன் மேனியிலே
பித்தனாய்
நான் மட்டும் உன் பச்சையிலே!!!!!
சிறகடித்துப் பறந்தோடும்
படபடக்கும் பாய்மரச் சிறகுகள்.
தொட்டு விட்டு குட்டு வைத்தாற்போல்
பொட்டுவடிவ விழிகள்.
மங்கையர் கை வளையலாய்
மாறிவிட்ட உன் மணிக்கழுத்து.
தன்னாலே தன்னாலே

குட்டைகுடை விரித்து அதன் நடுவே கம்பிகளாய்
தத்தித் தாவும் உன் கட்டை விரல்கள் .....
நிலத்தில் விளைந்த வளைந்த நெடுங்காயாய்
கொவ்வைப்பழச் சொண்டு.......
மாலைக் கதிரவனின் உரம் பாய்ந்த ஒளிக்கற்றாய்
கொத்தித் தின்னும் உன் கூர் மூக்கு......
முக்கனிகளில் முதல் கனி உன் மூக்கு -மனித
முகம் காட்டும் வளை மூக்கும் உன் மூக்கே.
கிளிபோல பெண் என்றும் சொன்னதெங்கே
உவமை உருமாறிப் தடுமாறிப் போனதிங்கே.
உன்னாலே உன்னாலே!!!!


உன்னைச்சுற்றி ஓராயிரம் கனி இருக்க
கனியாத இலவம் காய்க்காய்
நீ காத்திருந்ததும் ஏனடி?
இலவு காத்த கிளியென
ஏளனப் பேச்சும் எதற்கடி?
காதலுக்கு உருவகம் நீயடி
அதற்காய்
நிலவு காக்கும் கிளியென
பட்டமும் கொடுப்பேனடி.

வண்ணங்கள் பலவென்றாலும்
கர்வம் ஏதும் இல்லாமல்
நட்புடன்
பகிர்ந்துண்ணும் பாசக் கிளிகள்.
நாளையும் வேண்டும் பணம்
என்கிறது மனிதமனம்
நாளையே மாயை என்பது
உன் குணம்.

கிளுகிளுப்பு நிறத்தாலே
கிறங்கடிக்கும் பேச்சாலே
சிரிப்பும் சிறு கெக்கலிப்புமாய்
சுதந்திரமாய் சுற்றித் திரிந்த
என் மனக்கவர்ந்த பச்சைக்கிளி
பக்கத்துக்கு வீட்டு
விட்டத்தில்
தொங்க விட்ட கூண்டுக்குள்
பாவமாய்.......!!!!

தோளில் அமர்ந்து
கொஞ்சி துஞ்சும் வேளை போக
மீதி நேரம்
தங்கக் கூட்டுக்குள்.....

பச்சைப் பசேல் காடும்
பறந்து திரியும்
உரிமையும் பறிக்கப் பட்ட
சிறகடித்து சிறகொடிந்து சிறகுதிர்ந்த
என் செல்லக் கிளி........


கூண்டுக்குள் நான்
என்

மனசாட்சிக் கூண்டுக்குள் நான்!!!!!!!
​

​

​

என் கிளியின் பேச்சையும் என் கவியின் நீளத்தையும் பொறுத்துக் கொண்டு பொறுமையாய் படித்ததற்கு நன்றி....

 

யாம்ஸ் குட்டி
கிளி குயில் மைனா பார்க்கணும்னா, உடனே என் வீட்டுக்கு வரவும்
உங்கள் வருகையை முன் பதிவு செய்தால்
முற்றிலும் வித்தியாசமான வரவேற்பு கிடைக்கும்
என் என் வேடந்தாங்கலின் பறவைகளிடமிருந்து:rotfl
எப்பவுமே இவைகளின் சங்கீதம் தான் என் காதுகளுக்குள் கேட்டுக்கொண்டே இருக்கும் ரம்யமாய்
நன்றி என் கிளியின் குயில் பேச்சைக் கேட்டு ரசித்து மயங்கி மகிழ்ந்து ........