பெரு மழையும் சிறு தூறலும்

நம் காதல் சந்திப்புகளின்
கடைசி நிமிடங்கள்
பெரு மழைக்குப் பின்
வரும் சிறு தூறலாய் குளிர்கிறது..

கண்கள் கட்டிக் கொண்டும்
விரல்கள் தொட்டுகொண்டும்
மேற்கே மறையும் பறவையுடன்
நம் காதல் கணங்களும் கரைகிறது…

உன் உள்ளங்கையில் சேர்ந்திருந்த
என் கைகளின் வெப்பமும்
என் கன்னங்களில் ஒட்டிக் கொண்ட
உன் தோள்களின் வாசமும்
இரவு வரை மலர்கிறது
காதலின் அடையாளங்களாய்

நான் பிரிந்து நடக்கும் கடைசி நொடியில்
தொடரும் உன் விழியின் தேடல்
பருவம் தப்பி பெய்யும் மழையின்
குதூகலத்தை விட்டு செல்கிறது என்னுள்

பெரு மழை இல்லாமல் சிறு தூறல்களால்
மட்டுமே நிறைந்து விடுகிற ஓடையைப்போல்
பார்வைகளால் நிறைந்து விடுகிறது நம் காதல்….