சொல்லாமலே .......

" இவளுக்கு என்ன வந்துவிட்டது ? " என்று திகைத்தான் ரமேஷ். காலையில் இருந்து கவனிக்கிறான், சுமதி ஒரு தினுசாக தான் நடந்து கொள்கிறாள். எல்லாவற்றிலும் ஏனோ தானோ என்று. பல முறை, பல விஷயங்களில் அவளை கடிந்து கொள்ள வேண்டி வந்துவிட்டது......அதுவும் , அண்ணி வந்திருக்கும் நேரம் பார்த்தா இப்படி நடந்துகொள்வாள்....?

சுமதி நன்றாக சமையல் செய்வாள், புது புது டிஷ் களை ஆசையுடன் கற்று , sunday lunch போது பிரமாத படுத்துவாள். ஆனால், இன்று வைத்திருக்கும் சாம்பாரில் உப்பு குறைச்சல், முட்டை போரியலில் மசாலா வாசனையே காணோம், வெண்டைக்காய் சரியாக வதங்கவில்லை .......கடனே என்று சாபிடவேண்டி இருந்தது. " ஏண்டி, அண்ணி கிட்ட தானே இதை பண்ண கத்துகிட்டே , அவங்க கை மணத்துலே இம்மி அளவு இதுலே காணோமே !"
அண்ணி குறுக்கிட்டு , " எதோ முடியவில்லை போலிருக்கு- டா , குத்தம் சொல்லாதே ,பாவம் ....." என்று சமாதானம் சொன்னாள் .

அண்ணி சென்ற பிறகு, சுமதியை பிடித்துகொண்டான் ரமேஷ் : " ஏண்டி இப்படி அழிச்சாட்டியம் பண்ணிட்டே இன்னிக்கு ? அண்ணி என்ன நினைப்பாங்க ! வருத்தப்பட மாட்டங்களா ...."
" வருத்தபடமாட்டங்க ! சந்தோஷ படுவாங்க !"
" என்ன உளர்ரே ?"
" அண்ணி உங்களுக்கு அம்மா மாதிரி இருந்து பார்த்துகிட்டவங்க ன்னு எனக்கு தெரியும்க. நீங்களும் அவங்க அன்பை, அரவணைப்பை, சமையலை புகழ்ந்து சொல்லுவீங்களே ! நமக்கு கல்யாணமான பிறகு அவங்க நம்முடன் தங்க வந்திருந்தபோது , என் சமையலை, பராமரிப்பை நீங்க பெருமையுடன் ஆஹா ஓஹோ ன்னு புகழ்ந்து பேசினது ஞாபகம் இருக்கா ? "
" ஆமா, அதுக்கென்ன ? அண்ணியும், 'உனக்கு அருமையான மனைவி வாய்ச்சதை நினைச்சு ரொம்ப சந்தோஷமா இருக்கு டா' ன்னு சொன்னாங்களே !"
" ஆமாங்க ! தம் பிள்ளைக்கு நல்ல வாழ்வு அமைஞ்சா வளர்த்தவங்களுக்கு சந்தோசம் தான்.....ஆனாலும், அண்ணியும் ஒரு பெண்ண தான். நீங்க என்னை கொண்டாடுறத ஒரு பக்கம் ஏத்து கிட்டாலும், இன்னொரு பக்கம் கொஞ்சம் வருத்த படாம இருக்கமாட்டாங்க ; உங்க மனசில் தான் ஒரு படி இறங்கிவிட்டோமோ ன்னு தோணி இருக்கும். " ம்ம் , அருமையான மனைவி கிடைச்சாச்சு , இனிமேல் ரமேசு நம்மளை எல்லாம் மறந்துடுவான்' ன்னு ரெண்டு மூணு தரம் சொல்லிட்டாங்க . ராதிகா வீட்டு கல்யாணத்து பொது கூட மத்தவங்க கிட்டே சொல்லிட்டிருந்தாங்க. சிரிச்சு கிட்டே தான் சொன்னாங்க . இருந்தாலும், மனசு மூலையிலே ஒரு சின்ன வருத்தம் இருந்தால் தானே அப்படியோரு பேச்சு வரும் ? பாவம் அண்ணி, நா அவங்களை ஒரம் கட்டிட்டதா நினைக்க கூடாது . அதுவே என் மீது பகையாக மாறிட கூடாது. அதனால தாங்க , கொஞ்சம் டிராமா போட்டேன் !"
" அட கடவுளே ! இது எனக்கு தோணாம போச்சே ! உனக்கு எப்படி புரிஞ்சிது ?
" பெண் உள்ளங்களுக்கு சொல்லாமலே புரியும் !...அண்ணி இனிமே அப்படி வருத்தப்பட மாட்டங்க, பாருங்க !.... ....நீங்களும் இனிமே மத்தவங்க எதிர்லே கொஞ்சம் அடக்கி வாசிக்க பழகுங்க !"
" உத்தரவு, அம்மணீ!"

 

Thank you , Suganyarangasam